Sunday, November 16, 2008

انا من غيرك ولا حاجة


تخيل كدة أن حد عارف كل أخطائك و كل المصايب اللي بتعملها
و انت ساعات كتير مش بترجع له و لا بتتكلم معاهمع انك بتحتاج له أوي
و تقعد تلف و تدور علي حد يسمعك و ف الآخر برضه بترجع له
عشان مش بتلاقي حد يسمعك و لا بتحس انك مستريح غير لما تتكلم معاه
و هوه بعد كل دة برضه مستنيك و مش بيعاتبك
مع أن فيه ناس أوي كتير غيرك و يمكن يكونوا أقرب ليه منك
بس برضه بيفرح إنك بترجع له رغم أنك مكن تكون بقالك فترة بعيد عنه
لأ و مش كدة بس ده بيسامحك ع الفترة اللي انت كنت بعيد فيها
و كمان بيحقق لك حاجات كتير أوي من اللي أنت بتطلبها و من غير أي مقابل
ساعتها بقي بتحس أنك ضعيف أوي من غيره
و فعلاً من غيره متسواش أي حاجة خالص
و أنك صغير أوي و متستاهلش المعاملة الكويسة اللي هوة بيعاملك بيها
فتقعد تدور علي كلام تشكره بيه
أو تعبر له بيه عن شكرك و آسفك و ندمك علي التقصير ف حقه
و تلاقي أنك مهما قلت عمرك ما هتقضي أفضاله عليك
و الحاجات اللي هوة بيعملها عشان خاطرك
فتتمني أنك تفضل جمبه علي طول و تفضل تشكره و تشكره و تشكره
و متبعدش عنه أبداً

..

يارب أنا من غيرك و لا حاجة


16 comments:

كاميليا بهاء الدين said...

يارب ما تسيبنيش .. انا من غيرك مفيش

بحب الاغنية دى اوى

ربنا كريم اوى ورحيم بعباده
اوى

كل الحب

Kiara said...

اه والله من غيره ولا نسوي اي شي

ســمـــر احمد said...

و جى خريفى مستعجل

ورعشة قلبى فضحانى

بخاف م البرد ..

و الوحدة ..



واخاف لو بان نشيج الروح

ما اعرفش امسح دمعتى تانى

و لا باقى ونيس و لا خل

غير كرمك

ولا ليا ف غير قربك سند ولا ضل ...

****
بوست حقيقى رائع وصادق جدا

بس قبل كل ده مبروك مبروووك مبرووك
صحيح متاخرة بس انا فرحتى بيكو كبيرة
يارب يوفقكو
ويسعدكو

حمامة said...

منورة يا سمورة بقالك كتير مجتيش
الله يبارك فيكي يارب عقبالك :)

*****

انا كمان بقول يارب
يارب انا تعبت

كلام جميل طبعاً
:):)

shaimaa samir said...

اقرب الينا من حبل الوريد

ياااااااااه

كم ارهفنى احساس البوست

ربنا معانا جميعا

ودى

صاحب المضيفة said...

اللهم عاملنا بكرمك لا بعدلك وأكرمنا بكل خير يا أرحم الرحمين


كل الود

المستنصر بالله said...

كلمات بسيطه بس عميقه فى معنها
فعلا ليس لنا سواه
الحمدلله الذى بعزته تتم الصالحات

تحياتى

Lola said...

انت بتتكلم عن ارقى واعمق علاقه ممكن تحسس الإنسان بالراحه فى الوجود..مهما لف ومهما دار ومهما تعب لحظم ما بيصى بخشوع ..يركع وبسجد ويدعى من كل قلبه بيغسل كل اللى جواه..لحظه ما بيعيط فى حضن ربنا ويوكل امرنا ليه بيرتاح بجد..لحظه ما يكتشف ان ربنا بيدى ويدى واننا كمان لا زم نقرب منه عشان منبقاش مجرد حيوانات تاخد وخلاص.

عارف الصلاه هى احلى حاجه فى الوجود..والخشوع نعمه من ربنا ياريتها تدوم علينا ديما. والواحد مهما شكر مش كفايه..كفايه بس اننا مسلمين.

انت حركت حاجات كتير جوايا.

لولا

المتمردة said...

ربنا كبير اوى ...وفعلا ملناش غيره ومن غيره ولا اى حاجة ...جميل :):)

Doaa Ebrahim Aaql said...

لامست القلب بكلماتك

.

ومن لنا سواه

.

مودّتي

قلب ينبض لله said...

الله
يارب أنا من غيرك ولا حاجة
ريحتني أوي الجمله دي
ماتتصوريش أزاي

يارب سامحني وساعدني وفرج كرب المسلمين

الفارس الملثم said...

انا في بداية البوست وانا بسمع عنه كنت مستغرب مين الانسان الجميل ده اللي ممكن يعمل كل ده , لكن مع نهاية البوست اكتشفت اد ايه احنا منخدش بالنا من حقه علينا وبس بنلجأله وقت الشده لكنه هو عمره ما رد رجانا وتوسلاتنا

من لنا اللهنا نلجأ اليه سواك

شادي أصلان said...

ماشيين في الدنيا بستره

وهو أعلم بحالنا

شهد الكلمات said...

الحمد لله رحمة ربنا واسعةو كبير هو اكبر
من الوجود كله و من غير رحمته نهلك

اللهم استغفرك و اتوب اليك فاغفر لي و لوالدي والمؤمنين و المؤمنات و المسلمين و المسلمات الاحياء منهم و الاموات و أدخلنا فسيح جنتك برحمتك يا ارحم الارحمين

امين يا رب العالمين

سمكه واحده said...

الله فعلا كلنا من غيره ولا حاجه ربنا يرضي عننا كلنا
كمان الاغنيه اللي بتعبر علي الكسوف والندم وجميله اوي
اغنيه حسين الجسمي
ربنا ربنا يا ولي النعم
جزاك الله عنا كل خير
ربنا يتقبل ويقربنا منه

و القادم....أجمل said...

الحمدلله

جزاكم الله خيرا