أحلي دقايق

انهاردة كان يوم من احلي أيام عمري ... ممكن اقول انه احلي يوم ف حياتي و ف عمري اللي فات كله
أجمل دقايق عشتها ... و بقول عشتها عشان فعلا حسيت اني عايش و بتنفس و بحس و بشوف و بسمع
عايش بجد زي ما ناس كتير اوي عايشة و زي ما كان نفسي اني اعيش طول عمري حتي و لو يوم واحد
انهاردة حسيت كل حاجة ممكن تتحس ف الدنيا كلها... حبيت و اتحبيت
و فرحت و حزنت و دمعت و حسيت بمسئولية
و طيرت و كتبت و قريت و كلت مورو و شربت نسكافيه و فيروز تفاح و قعدت ع النيل و بصيت للسما و شفت الغروب
و مشيت علي كوبري قصر النيل و الدنيا مطرت مطر رقيق و بصيت للقمر و النجوم والسحاب
انهاردة كان يوم ملون بشكل مش طبيعي ... ألوان هادية ورقيقة ... ملون بألوان طول عمري بحبها ... أخضر و لبني و بني
كل اللي بحبه عملته و حسيته ... كنت فرحان اني بتكلم ... كنت فرحان اني بتسمع ... كلامي كان فيه حزن ف احيان كتير اوي بس حتي الحزن كان بيسعدني ساعتها عشان كنت حاسس اني بطلع اللي جوايا من سنين و محدش سمعه قبل كدة ... كنت بتكلم من غير قيود بحرية محسيتهاش قبل كدة و براحتي ع الاخر و كنت بتسمع لاخر حرف لساني بينطقه ... مكونتش خايف لدموعي تنزل و انا بتكلم عن همومي اللي جوايا و المشاكل اللي انا فيها ... مبذلتش مجهود عشان امنع عنيا انها تدمع من كتر ما افتكرت و استرجعت اللي جوايا من احزان و ف نفس الوقت مكونتش مهموم بقدر ما كنت طاير ان في حد فاهمني و حاسسني و بيسمعني و بيشوفني بقلبه قبل ودانه و عينه ... يمكن الرمادي كان كتير شوية انهاردة بس الالوان كانت اكتر بكتير ... اكتر يوم ملون شفته ف عمري كله... كنت حاسس ان الدنيا بتضحك
و السما فرحانة و القمر بيبص عليا
و الشمس مش عايزة تغيب عشان تفضل معايا
و تشوفني و انا فرحان و مبسوط و النيل هادي و بيغني و صفحته صافية خالص
و مش بيعمل صوت عشان ميزعجنيش
انهاردة ممكن اقول عليه يوم البراءة و يوم الطفولة... رقة مش طبيعية مشوفتهاش قبل انهاردة ... ملامح مليانة براءة و طيبة
و مسحة حزن خفيفة زودت البراءة جمال
انهاردة نصي الرقيق الجميل اللي بقاله زمان تايه مني و مش عارف الاقيه... حسيته قاعد قدامي... بيكلمني و اكلمه
نصي اللي فضلت سنين بحاول احافظ عليه بس مقدرنش ... لقيته معايا انهاردة
انهاردة حسيت لاول مرة ف حياتي ان في حد ساند عليا و انا ساند عليه ... شايلين هموم بعض و بنخفف عن بعض
انهاردة ابتسمت كتير اوي .. اول مرة احس اني بعرف ابتسم كدة ...
ابتسامات و ابتسامات و ابتسامات...
انهاردة رغم اني متكلمتش كتير... بس كل حرف كنت حاسه اوي قبل ما اقوله ... قلبي كان بينطقه قبل لساني
انهاردة عرفت ان الكلام صعب اوي انه يعبر عن اللي جوانا لان ساعات اللي جوانا بيكون اكبر من اي كلام ممكن يتقال
و كمان عرفت ان اللسان غلبان اوي و بيكون غلبان اكتر لما القلب يكون مليان حاجات حلوة كتير .... مينفعش تتقال حروف
انهاردة يوم عمري ما هنساه مهما حصل ... هيفضل احلي يوم ف عمري

!! مستخبية

فى حاجات كتير اتغيرت

الدنيا لونت

خلاص وداعاً للأبيض وأسود

من النهارده هنطلع علبة الألوان ونلون كل حاجة

مبقاش في خوف

حاسة باطمئنان إلى حد كبير

يمكن الأمل ضعيف

بس مادام لسه في بكره يبقى اكيد في امل

أحساس الطفولة لسه مستمر

حاسه انى عيلة بضفاير

ماسكة ف ايد ابوها لتتوه منه

وف نفس الوقت فرحانه ومبسوطة

كل طلباتها مجابه

طفلة بريئة

مفيش اكتئاب

احساس الانبساط مسيطر عليا

ساعات اتنرفز وازعق بس ارجع وافتكر

انبسط

ابتسم

عارف كل ده ليه

كل ده علشان انا جواك

وردة بيضه جوه قلب ابيض

جواك دفا وامان و طفولة وفرحه

عشان كده

انا مستخبية من الدنيا جواك

اعتراف

جايبلى ورد صح ؟

! امممممم عرفتي منين بقى ؟

احساسي

لأ بجد بقى .. اكيد شوفتيني

انت متعرفش انى بحس بيك ولا ايه ؟

.....................

جبتلك الورد الأبيض اللى بتحبيه

ربنا يخليك

تعرفي انك شبه الورد

!!معقول

اكيد

ازاى؟

ف رقته و جماله

..............

انا بحب الورد اوى

ومين مبيحبش الورد

تعرفى ...... انا بحبك اوى

وانا كمان :)

ذلَّة لسان

حقائق يجب أن أواجهها
اعترافات يجب أن أتفوه بها
حقائق.. اعترافات
لن يختلف الأمر كثيراً
فما سأقوله ليس إلا ..كلمات
أحرف ضالة...
جمل تائهة....
سقطت مني سهواً في لحظة نادرة
لن تتكرر كثيراً
فنادراً ما تنتابني تلك الحالة

******

لم أعد أُبصر جيداً
تؤلمني عيناي كثيراً
فقد أرهقتها دوماً
بتحديقي كثيراً في أشياء
لم تكن تستحق طرفة عين
و ها هي الآن تقتص مني

******

لم أعد قادراً علي التحمُّل
أركن للراحة مِراراً
أفضِّل مِزاجي في أغلب الأحيان
مللت إيثارهم علي نفسي
لا أستطيع التأقلم
مع ما يرددون أو يطلبون

******

لم اعد أتقن الصمت
حروفي تتساقط مني دوماً
حتي صمتي..
هجرني
فقد تفوهت بتفاهات تكفي لابعاده
فأنا أحيا الآن عصر الثرثرة

******

لم أعد أطيق الانتظار
تنتابني نوبة تشاؤم عند لقياه
لم يكن يوماً نذير خير
انتظاراتي السابقة تكفيني
أيقنت منها أنه لا يجدي
علمتني أن لا انتظار بعد اليوم

******

لم أعد أحلم كثيراً
تجافيني أحلامي
حين كانت تأتيني
ألتقيتها بفتور
لم أرحب بها كما ينبغي
و لكني اشعر أنها..
ستأتيني في أقرب غفواتي

******

لم أعد قادراً علي التعبير عما بداخلي
أتلعثم كثيراً لأفصح عما بي
ابحث عن كلماتي
و إن وجدتها
أضعها حيث لا أقصد
أصبحت مبهماً
يبدو أن ما في جُعبتي
يحتاج للسان آخر ليخرج ما فيه

******

لم أعد صلباً كما كنت دوماً
أصبحت ليناً بما يكفي لطيَي
تشكلت كثيراً في الآونة الأخيرة
نسيت ما كنت عليه قبلاً
و لا أسعي لتذكره
سأبقي ليناً حتي أفتقد صلابتي

******

لم أعد هادئاً كعادتي
يعلو صوتي لأتفه الأسباب
أصبح صراخي وسيلتي الأولي
للتعبير عن غضبي و انفعالي
بعد ما كان منهم من استنكار لهدوئي
يشكون الأن صوتي المرتفع
اصبحت مزعجاً بما فيه الكفاية
سيكون شعاري في المرات القادمة
"ممنوع استخدام آلات التنبيه"

******

أصبحت أشجع مما مضي
فها أنا أقِّرُ بما كان مني
دون قيود أو عقبات
أهي تفاهات ؟؟
أم حقائق ؟؟
لم أعد اهتم
فما أدركِهُ جيداً
أنها نوبة من فقدان السيطرة
و ها أنا اعترف مجدداً
و بمِلء فمي
كل ماسبق لم يكن إلا...
ذلَّة لِسان

قطرة ماء

قطرة ماء...
صغيرة .. رقيقية .. ربما ضعيفة
سقطت يوماً فأحدثت ضجيجاً
حَـرَّكت ما رَكَد من أزمان
رءاها مَن رأي... سمعها مَن سَمِع
سقطت و سقط معها الكثير
اختلطت القطرات بالقطيرات
لا جدوي... سقطوا و كان ما كان
لم يعد يهم أيـُهما سقط قبل الآخر
لا تستطيع أن تميز إحداهما عن الأخري...تشابهوا تماماً
جمعهم إناء واحد ... أرض واحدة ... بحر ... نهر ...
صدقني... لا يهم
قطرة من هنا و أخري من هناك
سُكونٌ هنا و رُكُود هناك
ما هي إلا قطرات...
نرتوي بذكراها حين يؤلمنا الجفاف

دبلت بكير

تلك الوردة أُشبهها

و ربما هي تشبهني

" دبلت بكير "

طراطيش كلام

نفسي أقعد على عتبة القمر وأدلدل رجلي
وأبص ع الناس من فوق
واحكي له حكايات من القلب
وابتسم له أجمل ابتسامات
نفسي أروح القمر بس لوحدي
زى ما أتعودت أكون دايماً

هو أنا ليه على طول خايفة
بخاف من كل حاجة واى حاجة
بخاف من حاجات غريبة
بخاف من البحر والنار والسكينة
بخاف من زمان و دلوقتي وبكرة
بخاف من الناس ومنها ومنه
حتى الفرح ... بخاف أفرح
عشان كده لما بييجي مش بفرح

كتير بحس إني مملة
ده لأني روتينية جداً
بحب كل حاجة ف مكانها
كل حاجة لازم تتعمل بالطريقة اللي مفروض تتعمل بيها
برتبط بكل حاجة حواليا
بحب سريري وبطانيتي
بحب قلمي وكراستي
بحب موبيلي ونغمته اللي مبغيرهاش
بحب كل حاجاتي ونفسي تعرف عشان هي كمان تحبني

عندي أحاسيس طفولة غريبة
بالذات الأيام دي
يمكن عشان مش عشتها وقتها
مش مصدقة أن كلها أيام وهتم سن الرشد
الأيام بتمر
وأنا بكبر
بس لسه طفلة

خطوط حمراء

خطوط تشابكت مع خطوط
ظلت تتشابك و تتشابك
حتي التفت حول عنقي ..اتعبتني خنقتني قتلتني .. تعددت و ازدادت
فكلما احاول ان اقترب أجِد أنها ..
خطوط حمراء
لا ينبغي أن أتخطاها... لا يجب أن اقترب منها..

اذَكِّر نفسي سريعاً أن الاقتراب بداية التخطي
فاذهب بعيداً حتي لا أراها ... حتي لا أفكر فيها
و يهيأ لي اني في نطاق الأمان حيث لا خطوط حمراء
و لكن أجد خطوطاً قديمة رُسِمَت منذ زمن سحيق
و لما ابتعدت عنها و لم أرها
خيل لي أنها لم تعد كما كانت
بالت او مُحيت من أمامي
و لكن سرعان ما أراها تذكرني و تعيد علي مسامعي
إياك ان تقترب
فأجد ما كنت قد هربت منه أمامي
لا أدري أهروبي من خطوطٍ حمراء
أم ممن رسمها ؟!!
فأتبين و أمعن فإذا بي أراني وسط متاهة حمراء
غابة متشابكة الخطوط
خطوط قديمة..
وأخري لم انتهي من رسمها
و أجد نفسي حائراً
أريد الخروج و لكن بلا خسائر
أتراني سأنجح ؟؟ّ!
و لكني لم أتردد طويلاً
فقررت سريعاً
أن لا أجعلها خطوطأً حمراء
سأمحيها تماماً ... حتي لا أتعثر فيها
حتي أجوب الحياة بحرية