Sunday, March 29, 2009

...من الدفاتر القديمة



لمَّا تسكت اوي في وقت تكون محتاج اوي انك تتكلم
و كل ما تحاول تتكلم تلاقي في حاجة من جواك بتقولك ما تتكلمش
و كل ما تحاول تتكلم تحس انك بتتعب اوي اوي اكتر و اكتر

لمَّا تتعمد انك تبعد عن حد بتحبه بارادتك الكاملة
و كمان تبطل انك تقرب منه و تبطل تحاول ترجع علاقتكم ببعض زي الاول
و مهما حاولت تقرب تلاقي نفسك بتتعب نفسك اكتر من انك تفضل بعيد

لمَّا تتغير اوي اوي من جواك
حاجات كتير اوي تتبدل من جواك
و نظرتك للامور تختلف عن الاول بنسبة كبيرة جدا
و حاجات كانت تعتبر من الاساسيات في مبادئك و حياتك
تلاقيها بتخرج من تفكيرك تماما
و تحاول انك تعرف الأسباب فتتحير اكتر

لمَّا تحس انك بتموت كل حاجة حلوة جواك
و بتحط مكانها حاجات تافهة و هايفة و ملهاش لازمة
و بتحاول تحط نفسك في جو مش بتاعك و انت غريب عنه
و انت كمان متاكد ان عمرك ما هتكون مستريح لما تعمل كدة
و تحاول انك تبطل محاولاتك الفاشلة عشان تكون في الجو اللي مايناسبكش أصلاً و متعرفش

لمَّا تكون تعبان اوي من جواك و اقرب الناس يسألك مالك فتسكت
و متكونش عارف تقول اللي جواك زي ما هوة بالظبط
و تكون حتي مش قادر مع نفسك تقول اللي انت تعبان منه
و كل ما تحاول تقوله متقدرش و تسكت اوي اوي

لمَّا تكون عايز تعبر عن اللي جواك و مش عارف و مش قادر و مش عايز
مع انك بتكون محتاج اوي انك تقول انا بحب انا متضايق انا زعلان انا تعبان انا محتاج لحد جنبي
انفعالاتك كلها بقت شبه بعضها كله بقى واحد
بتكون تعبان أوي و مش عارف تقول : آه الحقوني يا جماعة

لمَّا تصد حد بيحاول انه يقرب منك
او يحسسك انك حد مهم بالنسبة له
و كمان مش عايز تعمل اي خطوة تفهمه انك حاسس بيه
مع انك محتاج اوي انك تعيش احساس القرب و الاهتمام

لمَّا تبطل تعمل حاجات كتير كنت بتحبها
و تبتدي تعمل حاجات ماكونتش طايقها
و توهم نفسك انك مبسوط و متأقلم

لمَّا تحس انك عايز تستريح و مش عارف
عايز تخلي عقلك يبطل تفكير برده مش عارف
عايز تحس و لو للحظات ان مفيش مشاكل
و انك في فترة نقاهة من التفكير
انت ساكت مبتتكلمش مع حد
بس جواك بركان من الافكار

لمَّا تحس انك عايز تبعد عن كل الناس و تكون لوحدك
و تبدأ من جديد من أول السطر
تبعد بعيد اوي عن اي حد ممكن يأثر عليك و لو بهمسة
و تلاقي انك مربوط بالف قيد يمنعك من الحركة

لمَّا تقعد مع نفسك و تكتشف انك واحد تاني
خالص غير اللي انت عرفته قبل كدة
و تدور علي نفسك متلاقيهاش في اي مكان من الاماكن
اللي كانت دايما بتكون موجودة فيه دايما
و تعرف ساعتها انها بعدت عنك اوي لانك
ظلمتها و قسيت عليها كتير اوي قبل كدة
و تقعد تدور و تدور و تتعب اوي لدرجة انك ممكن تتوه و انت بتدور عليها


لمَّا تحس انك مش قادر تسامح اي حد كان سبب
في مشكلة حصلت لك في يوم من الأيام
و عايز تصرخ في وشه و تقوله : اللي انا فيه دلوقتي انت السبب في جزء كبير منه
و انك مش قادر تسامح حتي نفسك اللي ادت له الفرصة انه يأثر عليها بالشكل دة

لمَّا تندم علي كل لحظة اديتها لحد ميستحقهاش
و علي كل ثانية ضحيت فيها عشان حد مبيقدركش و لا بيحس بيك
و لما تندم علي كل شعور جواك بيخليك تحن لناس عمرهم ما فكروا فيك أصلاً

لمَّا تحس انك بتخسر حاجات كتير من حواليك
و ناس غاليين عليك اوي بتفقدهم بكل بساطة
و مش قادر تتحرك و لا تعمل حاجة عشان يفضلوا جنبك

لمَّا تحس انك بتفقد كل حاجة كانت بتميزك
و تخليك دايما مختلف عن اللي حواليك
و تحاول تدور عليها عشان ترجعها و متلاقيهاش

لمَّا تحس ان مفيش فايدة من اي كلام
و انك مهما اتكلمت مفيش اي حاجة هتتغير من حواليك
و تحس انك مش قادر تغير اي حاجة بتحصل حواليك

لمَّا تحس كل اللي فات دة كله و اكتر كمان
تفتكر انك ممكن تكون عايش ازاي ؟؟
و ايه اللي جواك ؟؟
بتفكر في ايه ؟؟
بتتعامل مع الناس ازاي ؟؟
امتي تستريح ؟؟
امتي تعرف تفكر بهدوء ؟؟
او من غير هدوء حتي !!

حاولت اني اجمِّل الكلام شوية بس معرفتش
لاني ما اعتقدش انه ممكن يتقال غير كدة
..

10/10/2007

..


:D احم احم .. ملحوظة

صاحب البوست الأستاذ مؤمن ..غراب يعنى

بس حصل لخبطة ف النشر بس

:)

6 comments:

كاميليا بهاء الدين said...

علشان كلها احاسيس صادقة

مش ينفع انها تتجمل بالكلمات

لازم تكون عفوية وتخرج زي المشاعر ما بتقول

لكن فى حالة تجمع كل المشاعر دى
بيكون الانسان فى صراع
دوامة كبيرة محتاج يد تمتد له لتخرجه منها

وهو وحظه .. إما يجد اليد
أو ما باليد حيلة
يفضل كده حتى يتوافق مع كل مشاعره
يقبلها او يثور عليها ويرفضها ويأخذ قراره بالتعديل
كأن يتخلص من الصمت
ويعبر عن نفسه
كل حسب الموقف


سعدت بمروري فى سماءك


لكِ ودى

قلب ينبض لله said...

مش ها أقولك غير حاجة واحدة
أن كلامك وصف حاجات كتيير أوي بحس بيها
وبصراحة جه في الوقت المناسب

سلام ياجميله

Anonymous said...

كل منا يمر بهذه المشاعر بطريقة أوي بأخرى
لكنها كحال كل ما في الدنيا ، تأتي وتذهب
ثقي بالله دومًا
كوني بقرب من تحبين
وستكونين بخير :)

..
طيف :)

رحــــيـل said...

اوقات بتكون فتره انتقاليه من مرحله لمرحله
الاكيد ان محدش فينا بيفضل على حاله الايام بتغير فينا كتير والتجارب كل حاجه

الحمد لله انها دفاتر قديمه واتمنى تكون فتره وانتهت

تحياتى لكما

Anonymous said...

يا ولاد الذينا وحشتوني اوي جدا خااااااااااااااالص

مها ميهوووو

Hayam said...

اوقات كتيرة جدا مابنعرفش نعبر عن لي جوانا زي ماعبرت انت دلوقتي

يابختك