Tuesday, January 22, 2008

طراطيش كلام

نفسي أقعد على عتبة القمر وأدلدل رجلي
وأبص ع الناس من فوق
واحكي له حكايات من القلب
وابتسم له أجمل ابتسامات
نفسي أروح القمر بس لوحدي
زى ما أتعودت أكون دايماً
هو أنا ليه على طول خايفة
بخاف من كل حاجة واى حاجة
بخاف من حاجات غريبة
بخاف من البحر والنار والسكينة
بخاف من زمان و دلوقتي وبكرة
بخاف من الناس ومنها ومنه
حتى الفرح ... بخاف أفرح
عشان كده لما بييجي مش بفرح

كتير بحس إني مملة
ده لأني روتينية جداً
بحب كل حاجة ف مكانها
كل حاجة لازم تتعمل بالطريقة اللي مفروض تتعمل بيها
برتبط بكل حاجة حواليا
بحب سريري وبطانيتي
بحب قلمي وكراستي
بحب موبيلي ونغمته اللي مبغيرهاش
بحب كل حاجاتي ونفسي تعرف عشان هي كمان تحبني

عندي أحاسيس طفولة غريبة
بالذات الأيام دي
يمكن عشان مش عشتها وقتها
مش مصدقة أن كلها أيام وهتم سن الرشد
الأيام بتمر
وأنا بكبر
بس لسه طفلة


4 comments:

جسر الى الحياة said...

احلى حاجة انك تكبرى وجواك لسه طفلة عارفة ليه لانك حتبقى شفافة وبريئة وجميلة اكبرى اكبرى بس سيبى الطفلة جواكى زى ما هيا صدقينى ده اجمل بكتير من انك تبقى صغيرة وجواكى بيشيخ

حمامة said...

صح يا جسر بجد
عندك حق
انا قريت قول قبل كده لأديب عالمى بيقول :
يولد الناس ثم يكبرون لكن فقط من يكبر ويظل بداخله الطفل هوة فقط من يمكن ان نطلق عليه انساناً
اسعدنى مرورك جدا عندنا ف الجنينه بتاعتنا

المهاجر الحالم said...

ليه الأسى والحزن اللى فى البلوج ده كله أنا حاسس إنى لو سبت نفسى أنا هبكى فورا بس أنا فى سيبر بس أقولك أنا حاسس الصدق فى كلامك لذلك أنا هنصحك نصيحة هى أن الدنيا ليس فيها ما يحزن عليه الإنسان أكثر من ضياع عمره فى الحزن لذلك رجاء لاتحزنى وأرجو أن أجدك أكثر تفاؤلا وسعادة فى الزيارة القادمة

المتمردة said...

انتى كمان ياحمامة جواكى طفل وجميل اوى

كلام رقيق ومعبر والاهم انه حقيقى