Thursday, February 14, 2008

أحلي دقايق



انهاردة كان يوم من احلي أيام عمري ... ممكن اقول انه احلي يوم ف حياتي و ف عمري اللي فات كله

أجمل دقايق عشتها ... و بقول عشتها عشان فعلا حسيت اني عايش و بتنفس و بحس و بشوف و بسمع
عايش بجد زي ما ناس كتير اوي عايشة و زي ما كان نفسي اني اعيش طول عمري حتي و لو يوم واحد
انهاردة حسيت كل حاجة ممكن تتحس ف الدنيا كلها... حبيت و اتحبيت
و فرحت و حزنت و دمعت و حسيت بمسئولية
و طيرت و كتبت و قريت و كلت مورو
و شربت نسكافيه و فيروز تفاح و قعدت ع النيل و بصيت للسما و شفت الغروب
و مشيت علي كوبري قصر النيل و الدنيا مطرت مطر رقيق و بصيت للقمر و النجوم والسحاب

انهاردة كان يوم ملون بشكل مش طبيعي ... ألوان هادية ورقيقة ... ملون بألوان طول عمري بحبها ... أخضر و لبني و بني
كل اللي بحبه عملته و حسيته ... كنت فرحان اني بتكلم ... كنت فرحان اني بتسمع ... كلامي كان فيه حزن ف احيان كتير اوي بس حتي الحزن كان بيسعدني ساعتها عشان كنت حاسس اني بطلع اللي جوايا من سنين و محدش سمعه قبل كدة ... كنت بتكلم من غير قيود بحرية محسيتهاش قبل كدة و براحتي ع الاخر و كنت بتسمع لاخر حرف لساني بينطقه ... مكونتش خايف لدموعي تنزل و انا بتكلم عن همومي اللي جوايا و المشاكل اللي انا فيها ... مبذلتش مجهود عشان امنع عنيا انها تدمع من كتر ما افتكرت و استرجعت اللي جوايا من احزان و ف نفس الوقت مكونتش مهموم بقدر ما كنت طاير ان في حد فاهمني و حاسسني و بيسمعني و بيشوفني بقلبه قبل ودانه و عينه ... يمكن الرمادي كان كتير شوية انهاردة بس الالوان كانت اكتر بكتير ... اكتر يوم ملون شفته ف عمري كله... كنت حاسس ان الدنيا بتضحك
و السما فرحانة و القمر بيبص عليا
و الشمس مش عايزة تغيب عشان تفضل معايا
و تشوفني و انا فرحان و مبسوط و النيل هادي و بيغني و صفحته صافية خالص
و مش بيعمل صوت عشان ميزعجنيش

انهاردة ممكن اقول عليه يوم البراءة و يوم الطفولة... رقة مش طبيعية مشوفتهاش قبل انهاردة ... ملامح مليانة براءة و طيبة
و مسحة حزن خفيفة زودت البراءة جمال
انهاردة نصي الرقيق الجميل اللي بقاله زمان تايه مني و مش عارف الاقيه... حسيته قاعد قدامي... بيكلمني و اكلمه
نصي اللي فضلت سنين بحاول احافظ عليه بس مقدرنش ... لقيته معايا انهاردة
انهاردة حسيت لاول مرة ف حياتي ان في حد ساند عليا و انا ساند عليه ... شايلين هموم بعض و بنخفف عن بعض
انهاردة ابتسمت كتير اوي .. اول مرة احس اني بعرف ابتسم كدة ...
ابتسامات و ابتسامات و ابتسامات...
انهاردة رغم اني متكلمتش كتير... بس كل حرف كنت حاسه اوي قبل ما اقوله ... قلبي كان بينطقه قبل لساني
انهاردة عرفت ان الكلام صعب اوي انه يعبر عن اللي جوانا لان ساعات اللي جوانا بيكون اكبر من اي كلام ممكن يتقال
و كمان عرفت ان اللسان غلبان اوي و بيكون غلبان اكتر لما القلب يكون مليان حاجات حلوة كتير .... مينفعش تتقال حروف

انهاردة يوم عمري ما هنساه مهما حصل ... هيفضل احلي يوم ف عمري

15 comments:

camellia said...

يارب كل الأيام تبقي حلوة كدة

أمير الهدوء said...

الحمد الله عرفت اوصل للمدونه
بس لما وصلت للمدونه دي
اكتشفت إني مش في مدونه
إكتشفت إني في بستان ملئ بالمشاعر الدافئه الصافيه الجميله

المواضيع كلها حسيتها بجد

والموضوع ده بالذات لأني عملت نفس التجربه كتييير
وانا بقرأ الموضوع ده
حسيت كأني بعيشه

سعيد جدا لأني في المدونه الجميله دي

تحياتي و تقديري


بس ممكن لو أعرف سبب تسمية المدونه بالغراب و الحمامه
وإيه هي الورده البيضاء
؟

وشكرا




أحمد

إبـراهيم ... معـايــا said...

إيه يا عم الجمــال ده كلللله
... ربنــا يسعدكم على طووووووول

ام دودي said...

ما شاء الله

رائع جدا

انا ليا ميول ادبية برضو بس
مش بالجمال ده

ابقى اتفضل القى نظرة عندى

لسة مدونة لانج اللانج

تحيااااااااتى

لولا said...

يارب تكون ايامك كلها حب في حب وسعاده
بجد كنت سعيده اوى بقراء
بحس بسعاده لما بقرا بوست ويكون احساسه صادق كده
تحياتى ليك
وتمنياتى بحب دايم للابد

لولا

bocycat said...

اشمعنى غراب وحمامة ؟ .. مينفعش كروان ويمامة ؟؟؟ ايه التصالح اللى مع النفس ده كله دى احلى حاجة فى الدنيا ان الواحد يتصالح مع نفسه ومع الدنيا وده مش بيحصل الا اما بنحب ونتحب من نفس الشخص اللى بنحبه .. ربنا يوفقك .. تحياتى

LAMIA MAHMOUD said...

ربنا يديمها عليكي سعادة
مع اني مبحبش كوبري قصر النيل في المطرة :)
بس اختلاف الاذواق لا يفسد للود قضية

حمامة said...

منورين كلكم المدونة
وبحد سعداء بمروركم الطيب
انا قولت ارد لحد ما غراب ييجى بالسلامة يرد عليكم واحد واحد
وان شاء الله التساؤل بتاعكم هيكون الرد عليه جاهز قريب جداً
نورتم بجد :):)

جسر الى الحياة said...

ربنا يجعل ايامك كلها فرحة وسعادة وعايزة اقولك لولا الاحزان ما كنا عرفنا طعم الفرحة بس بجد احساسك بالاشياء جميلوبالتالى اكيد احساسك بالاشخاص اجمل واجمل

Gloomy Nemo said...

رووعة

ربنا يوعدنا بيوم من الأيام دى

قولوا أمين

رانيا منصور said...

ربنا يسعد قلبك يا افندم يارب

دايماً


...
مودة،،

و القادم....أجمل said...

ما شاء الله
ربنا يديم علي الجميع السعادة
و يوفقكم كلكم يارب

الكلام و البوست
بحسة ان كل حرف فيه بيضحك
:D

احترامي و تقديري
:)

غراب said...

السلام عليكم و رحمة الله و بركاته

منورين المدونة كلكو
سعيد بوجودكم و تعليقاتكم الجميلة

(: (:

الفارس الملثم said...

حقيقي كل المشاعر والاحاسيس اللي وصفتيها قمة في الروعة

وبالتاكيد الانسان لما بيكون سعيد وفي حالة حب بيحس ان الكون كله بيشاركه مشاعره دي

تقبلي مروري

حمامة said...

ممكن اعلق ؟؟؟
انا مبسوطة انك مبسوط
ومبسوطة انى كنت جزء من اللحظات
ولسه مبسوطة وبتبسط كمان وكمان

:):)