Thursday, March 13, 2008

اللى مشيوا

مش عارفه ليه الواحد دايماً لما يكون مبسوط اوى
او يحس انه مرتاح وكويس واموره مستقرة إلى حد كبير
ويقعد مع نفسه شوية يفتكر اللى فات والذكريات
ويفتكر الحاجات الوحشة اللى مرت بيه
" هو صحيح الواحد لما بيوصل لقمة التعاسه لما يحس بقمة السعادة "
جايز
لأ .. ممكن
وليه لأ


الأيام دى بتراودنى افكار كتير جداً وبفتكر اوى الناس اللى مشيوا
مع أنهم ميستحقوش انى افكر فيهم
بس بفتكر شكلهم .. كلامهم .. ضحكهم.. الأماكن اللى جمعتنا
اللحظات الحلوة .. لحظات الألم والجرح
حاسة انى بظلم نفسى وبتعبها وبظلم ناس تانية معايا بالتفكير فيهم
مع انى مبفكرش فيهم لأنهم وحشونى
بس لأنهم قتلونى وبحاول اصحى وحاسة انى مش عارفه

"علي فكرة أنا معقدة "

( هما )
لما بفتكركم بغمض عيني او بدور وشي علشان مش اشوفكم قدام عنيا
بفتكر كلامكم وازاى انا صدقته وازاى استغليتوا سذاجتي وطفولتي وبراءتى
وقد ايه انا كنت غبية وعامية
" هو صحيح مراية الحب عامية ؟ "
بسأل نفسي ساعات انتوا مستريحين
يعنى ضميركم مرتاح ومبسوطين وبتمارسوا حياتكوا عادى يعنى
ولا كأن حاجة حصلت
عموماً انا مش هاسامحكوا وهو ده انتقامى منكوا
علشان ضميركم يعذبكوا كده على طول
لو كنتوا فاكرين اصلاً
ولو كان عندكوا ضمير

(هى)
هو انا ازاى حبيتك ؟؟؟
استغليتى رقتك و ملامحك البريئة ف انك توقعى كل الناس ف حبك
وقد ايه انتى بتضحى واد ايه انضحك عليكي كتير
قد ايه انتى طيبة ورقيقة
ده علشان مش عارفينك كويس
ازاى حبتينى وانتى كنتى بتشجعينى على حاجات مش صح
ازاى حبتينى وانتى كرهتى ناس كتير فيا
ازاى حبتينى وانتى حاولتى بكل قوتك تفقدينى ثقتى ف نفسى
على فكرة مش تطمنى اوى يعنى
اكيد ف يوم من الأيام القناع هيقع وكل الحقيقة هتبان
واكيد الفيلم بتاعك السخيف نهايته قربت

(هى )
يمكن مش مشيتى اوى
بس مؤلم بالنسبالى اكتر اننا نوصل لكده
مش قادرة انسى انك اول بنت اتعرفت عليها ع الانترنت
واول واحده قابلتها واتعرفت على عيلتها
من حبى فيكى كنت مسمياكى مراتى
وكل الناس كانوا مستغربين من حبينا لبعض اوى كده
يوم ما شفتك مصدقتش انى بحب القمر دى
أكلنا سوا وقعدنا براحتنا زى ما يكون بيتنا بالظبط
والكرسى الهزاز بتاعك زعلانة انى مقعدتش عليه كتير
القلب الاحمر اللى بيقول i love u
انا مخبياه ف مكان بس مش لاقياه دلوقتى
هو كمان ضاع ف كراكيب الدنيا
ويوم ما جيتي بيتنا وقعدنا فوق لوحدنا انا وانتى وبس
وكل شوية اخدك ف حضنى
واخر يوم اتقابلنا وكنت مكسورة اوى من الدنيا
فاكرة لما اتصورتى فوق الشجرة
انا اللى شيلتك طلعتك فوق
اللى مصبرنى انى بكلمك من وقت للتانى
وانك رغم الزهايمر المبكر لسه فاكره اسمى
وفاكره كل حاجة بحكيلها
وانك لسه بتقوليلى انى حاجة تانية خالص ف القلب

( هى )
يمكن مكناش اصحاب اوى
بس بفتكرك اوى الأيام دى ف الجامعة
يمكن لانى بشوف ناس شبهك
فاكرة التليفونات وقد ايه كل شوية كنا بنكلم بعض
كنتى دايماً تكلمينى
فاكرة الحلم ؟؟
اللى اول ما صحيت منه اتصلت علشان اتطمن عليكى
" حلمت اننا اتخانقنا مع بعض .. انتى زعلانة منى ؟؟؟"
بس انتى عمرك ما اخدتى موقف من حد أذانى
مش المفروض انك صحبتى برضه ؟
قولتى كلام حسيت انه عليا
من يومها مش قادره اسامحك ولا اكلمك ولا حتى ارن عليكى

كل دول لما بفتكرهم بفتكر ايام زمان
عايزة استيكه كبيرة امسح اللى فات
بس للأسف مينفعش ما هو اللى فات ده برضه هو اللى وصلنى للى انا فيه دلوقتى
كل اللى حصل هو اللى شكلنى
صحيح شخبط عليا بس اكيد كل الشخابيط دى زى ما ملتنى
رمادى واسود اكيد برضه وصلتنى لحاجات كويسه وادتنى خبرة

واكيد برضه اللى صبرنى وجود اللى جم بعدهم حواليا
و قد ايه حسسونى بحبهم ليا وفهمهم ليا او على الأقل محاولتهم انهم يفهمونى
رغم البعد .. رغم عدم التعبير .. رغم قلة الكلام بينا
بس انا عارفه ان رغم البعد فى قلب بيحس ولسان بيدعى
ورغم عدم التعبير فى افعال بتدل على ده
ورغم قلة الكلام إلا ان فى عقل بيفتكر وذاكرة مليانه ذكريات

ووجودك انت كمان ووقوفك جمبي وحبك ليا
وفهمك لعقليتى واحساسك بمشاعري واستيعابى جواك
اكيد الحاجات دى فرقت معايا كتير
بجد
ربنا يخليكوا ليا





38 comments:

الساحرة said...

اللي مشيوة ميستهلوش يرجعوة تاني حتي لو بنقول انناكرهناهم نبقي بنضحك علي نفسينا لان اللي بيحب عمرة ما يكره
خلينا في المهم الناس اللي موجودين وبيحبونه فعلا

اكيد يستحقوة انناننسي الدنيا علشانهم

تحياتي

امرأة تقول الذي لا يقال said...

كل اللى حصل هو اللى شكلنى
صحيح شخبط عليا بس اكيد كل الشخابيط دى زى ما ملتنى
رمادى واسود اكيد برضه وصلتنى لحاجات كويسه وادتنى خبرة

واكيد برضه اللى صبرنى وجود اللى جم بعدهم حواليا
و قد ايه حسسونى بحبهم ليا وفهمهم ليا او على الأقل محاولتهم انهم يفهمونى
رغم البعد .. رغم عدم التعبير .. رغم قلة الكلام بينا
بس انا عارفه ان رغم البعد فى قلب بيحس ولسان بيدعى


بجد مفيش كلام ممكن أقولهولك أحلى من اللي انتي قلتيه (:

حمامة said...

الساحرة

منقدرش نقول كرهناهم
لاننا لو كرهناهم يبقى من الاصل مش حبناهم زى ما قولتى اللى بيحب عمره ما يكره ياما قلبه عمره ما هيعرف الحب

نورتينا:)


امرأة تقول الذي لا يقال

وجودك بجد بقى بيسعدنى ويحسسنى احساس كده حلو معرفش ليه

نورتى طبعاً :):)

lonlysmily said...

هتصدقينى لو قولت انى حاسه كلامك اوى اوى
وعارفه معنى اما تحبى ناس وتعتبريها قريبه منك وفى الاخر تكتشفى ان الناس دى مش تستاهل حتى منك اى كلمه
بس مش تكونى زيهم خليكى ارقى واحسن
سامحى واغفرى وصدقينى لو سامحتى هتكونى افضل منهم هتحسى انك احسن منهم وهتحسى بارتياح وسلام مع نفسك
وهم اللى هيتألموا من روحك وسماحتك دى
حاولى والنتيجه بجد مضمونه
تحياتى ليكى ويارب ما تقابلى غير الناس اللى تحبيهم ويحبوكى

Mahmoud(WHYME) said...

أعجبنى إسلوبك فالكتابة وكلماتك المعبرة
تحياتى لك

Sometimes said...

اللى فات فات
بس عمرى ما يتنسى
وكل لحظه او موقف اكيد بيفكرنا بيه
وساعات كتير بنتمنى من ربنا اننا ننساه ونبدأ الحياه من جديد
بس للاسف مينفعش
خلاص ده بقى جزءمن حياتى

انا سمعت تشبيه للحكايه دى
ماضينا ده زى الجاكيت بتاعنا
قلعته ونسيت الهم شويه
بس بترجع تلبسه تانى علشان هو بقى جزء منك

بس كل اللى عليك انك تنضفه او تشيل التراب اللى عليه

تحياتى لقلمك الرائع

حمامة said...

lonlysmily

إن شاء الله احاول
نورتينى:)


Mahmoud(WHYME)
شكراً لك اسعدنى مرورك


Sometimes

تشبيه ف محله تمام
يسعدنى وجودك الدائم

شهرزاد said...

كل شئ بيحصل في حياتنا لحكمة من الله عز وجل
"وعسى أن تكرهوا شيئا وهو خير لكم"
حتى لو ماعرفناش السبب دلوقتي لكن في وقتها هنضحك ونقول ياريت ده حصل من زمان

(( قيثارة الأحلام )) said...

الانسان اللى ملوش ماضى يتألم منه وعليه مش هيقدر يكون له حاضر يحاول يلاقى نفسه فيه صدقينى الازمات بتصنع المعجزات

walaa said...

الحياه اللى احنا بنعشها بنقابل ناس كويسه تستاهل حبنا واخلاصنا وفى ناس قبلنها بنندم اللى احنا عرفنها دايما
بس الحلو نحاول نتذكره بالخير والوحش نحاول ننساه علشان ذكراه بتقلب علينا الاحزان
وخلينا فى الحاضر وننسى الماضى لانه كان
وانتهى
تحياتى ولاء

أمير الهدوء said...

الاستيكه موجوده
ابعدي عن التفكير في الماضي التعيس
ابعدي
حاولي
مش تخافي
امسكي قلمك
ارسمي ابتسامه على الحاضر
علشان تفتكريه بعد كده

خلاص كفايه حزن
اتوضي وصلي ركعتين
ادعي ربنا

روحي مكان جميل
وغمضي عينك
هتلاقي الهوا بيجبلك ذكرياتك الجميله لحد عندك

قرري انك مش بس هتجلسي تنظري في صفحات ذكرياتك
لا قرري انك ترسمي ذكريات جديده في صفحات بيضاء جميله





تحياتي
:)

حمامة said...

شهرزاد

اكيد طبعاً .. وله فى ذلك حِكم
الحمد لله على كل شىء

نورتى :)



(( قيثارة الأحلام ))

كلامك مقنع جداً
واعتقد انه هيحلينى ابص للموضوع من ناحية مختلفة تماماً بجد اشكرك :)



walaa

صح اوى يا ولاء
كان فعل ماضى كان مالنا وماله
من الأول :)


أمير الهدوء

حلول هايلة
يسعدنى وجودك الدائم

:)


بجد يا جماعة مش عارفه اقولكوا ايه
بس انتوا هتخلونى اعيد النظر ف
طريقة تفكيرى ربنا يكرمكوا يارب

:)

رئـــــيسـة حزب الأحلام said...
This comment has been removed by a blog administrator.
الشخص الذي سيأتي بالتأكيد said...

انه الزمن اذا
مدرس خصوصي
يعلمنا و يسقنا من نبع حكمته
لكنه يحتاج مثله مثل اي مدرس آخر
ثمنا
كي يتدبر به امر المعايش

احييكِ

فاضل

weswes said...

كلماتك رقيقه ومعبره
بس فى اعتقادى ان فعلا الانسان اول ما يرتاح كده ومش يلاقى حاجه مضيقاه يروح يقلب فى دفاتره القديمه
اللى غالبا سيكون فيها ما ينغص عليه راحته
لك تحياتى

سنووايت said...

كل حد بنقابله في حياتنا بنقابله علشان حاجة معينة اكيد في صالحنا حتي لو ضربنا او انجرحنا ادينا بنتعلم
وربنا بيعوضنا باحسن منه

الفارس الملثم said...

بصي يا حمامة , لو ما تالمناش عمرنا ما نتعلم ,الالم هنا هو الشئ اللي بندفعه عشان نعرف الحياة اكتر ونختبر حقيقة ومشاعر اللي نعرفهم اكتر

حب انتهي بوجع , صداقة انتهت بمرارة , ناس جرحونا, ناس اكتشفنا كدبهم , كل دي خبرات من الحياة اشبه بالتطعيم اللي بناخذه عشان نقدر نواجه الحياة بكل ما فيها

ودايما انلاقي في الحياة طول ما احنا عايشينها ابتسامة يجي بعدها دموع , وحزن تيجي بعديه ضحكة من القلب

تقبلي مروري

غربة وطن said...

الي مشيو ناس احنا منحبهم اكتر من نفسنا
بس خلاص مشيو وما راح يرجعو

حمامه
أنت
يا سارقة ياء النداء من حروفي
لماذا أنتِ مرتبكة ؟
نعم أعنيك أنت
ادعوك للإنضمام للفكرة
فانتِ وحدك .. تلك التي لم تأت
هذا طريق لم يكن يعرفه احد
و لا يعرف احد
طريق لم تعرفه اقدام المارة
و لم تدنسه من قبل عجلات سيارة فارهة وقودها من عرقك و دمي
تعالي معنا و املئي الدنيا بالضجيج
نظرة على اسرار اون لاين لن تضيرك
و مشاركتك تأكدي انها مصدر سعادة لنا
http://asraronline.com/vb/

حمامة said...

الشخص الذي سيأتي بالتأكيد

عجبنى اوى تعليقك
فعلاً محدش بيتعلم ببلاش :)


weswes

مش كل الناس يابنتى
النكديين بس اللى زيي :D


سنووايت

صح افعالنا هى اقدارنا
الحمد لله على كل حال :)


الفارس الملثم

صح
المهم اننا هنوصل ف الأخر للفرح
بس علشان نوصله لازم نتعب ونتألم
يأما عمرنا ما هنحس بطعمه ابداً

اسعدنى مرورك جداً :)


غربة وطن

ممكن نحبهم لو هما ليهم افضال علينا
ولو هما مش جرحونا
محدش بيحب حد جرحه

منى said...

هى الدنيا
فلازم نقابل من ده وده
وكويس اوى فى رحله الايام اننا نفوز باشخاص يحسسونا اننا نهمهم
اما الباقى
مش نكرههم
ممكن نعذرهم
ونحاول ننسى
تحياتى

الشموع السوداء said...

الحمامه الجميله..كلامك معبر جدا ولمس كل اوتار الالم بس عاوزه اقولك يمكن كنت لسه اتبه مووضع عن الذكريات المؤلمه وكنت بقول لها انى هطردها من حياتى لانها تعبتنى وقتلت فيا الاحساس بالحاضر او المستقبل بتخلينى اعيش فى متاهة الالام الماضيه ..يمكن الكلام ده نظريا بيكون جميل لكن مع تطبيقه بيكون صعب بس صدقينى ده الحل الوحيد ..كل تجاربنا فى الصداقه او الحب او الالام بتعلمنا حاجات كتير حتى لو المتنا حتى لو مفهمنهاش دلوقتى..تحياتى لكى

حياتي قنبلة ذرية said...

حمامة

جميل اننا نطله اللي جوانا بدل منطق نموت

بس خلي بالك كل تجربة مهما ان كانت قاسية اكيد خرجتب منها بفايدة و مهم كمان انك تاخدي بالك في التجربة الجاية متلقيش من الحرج لأنه لازم حيلتئم في يوم من الايام و اللي جرحوا اكيد حيتجرحوا تأكدي من ذلك

حمامة اسلوبك جميل جدا و اعجبني يا ريت تكملي علي نفس النهج

كاميليا said...

كل دول لما بفتكرهم بفتكر ايام زمان
عايزة استيكه كبيرة امسح اللى فات
.........

انا مش معاكى فى دى
وأقولك ليه...

لإن كل من دخل حياتنا، اكيد عيشنا معاه ولو لحظة واحدة حلوة
ضحكنا ضحكة،، فرحنا فرحة،، قلبنا دق دقة حب

يبقى نحتفظ من الوردة بعبيرها ،، وجمالها
ومش نفكر فى اشواكها اللى جرحت ايدينا

كل شخصية مرت فى حياتنا
نفكر فى اول معرفتنا بيها
وننسى نهايتها

الإنسان مش يقدر يعيش من غير ذكريات
بس الأهم
إنه يختار الجزء الجميل فيها
لنفس الاشخاص
مش يوم خروحهم وصوت صفعة الباب وراهم

قلبك رقيق اوى
تحياتى وتقديرى

كاميليا

انا مذنب said...

عايزه تعرفي عايشين ازاي

بسيطه قوي الواحد بعد ما يقتل حد يعمل ايه بيغسل ايده من الدم

ولما البوليس بيساله بيعمل ايه بينكر طبعا

يبقى هو ده النظام بنغسل الموضوع من دماغنا اساسا وبننسى ضحايانا اصلا
وننكر الموضوع من اساسه

يعني لما تقابلي اللي غدر بيكي اصلا مش هيفتكر انه غدر بيكي هيقولك ياه ايام وعدت خلاص

لكي مني كل التحيه

محض روح said...

popopk
مش عارفه اقول ايه
بس كلامك لمسني اوي

west said...

مش عارف هاقرا البوست تانى على رواقه وابقى اقول اوك اصله معقد شويه

Miss Dot said...
This comment has been removed by a blog administrator.
Miss Dot said...
This comment has been removed by a blog administrator.
Miss Dot said...
This comment has been removed by a blog administrator.
shirry said...

في كلمة لانيس منصور بتقول
الحب ليس اعمي وانما مصاب بطول نظر لا يدرك الاخطاء الا عندما يبتعد
اما اصحابك دول فاكيد كل واحد فينا اتقرص من اقرب اصحابه

وانا شايفة انك من الطبيعي تفتكري بس لما تفتكري افتكري اللحظات الحلوة وتسبيش اللحظات الوحشة تبوظ الزكريات الحلوة

اصل انتي برضو لازم يبقي عندك زكريات تفتكريها والا حياتك تبقي مالهاش لازمة

واهم حاجة انك اتعلمتي من غلطك ودي حاجة كويسة

اتمني لك اوقات سعيدة دايما
وابقي تعالي تاني

حبيبه said...

ياااااااااااه كلامك فكرني بنفسي اللي كنت نسيتها مع اللي راحوا
احساس صعب قوي لما تثقي في حد قوي ويطلع في الاخر ميستهلش الثقة دي
بس زي ماقولتي اللي حصل هو اللي شكلناوادانا خبرة علشان منقعش تاني

بيسوو said...

مش بفكر كتير في الي مشيوا قد ما بفكر في الي لسة موجودين

اصل الي عايز يمشي..هيمشي..مهما فكرنا احنا عملنا ايه غلط علشان يمشي..وممكن يمشي مش علشان الغلط مننا احنا..ممكن يكون منه هو

انك تفهمي الناس كلها...دي يبقى اسمها معجزة

يمامة شاردة said...

كل شخص بنقابله بحياتنا بيطبع ختمه في شخصيتنا .. حبيناه بأه كرهناه لازم يسيب أثر .. و في كل الأحوال بنستفيد من الأثر ده و بنحتاجه في يوم من الأيام .. كفاية إنك بتاخدي خبرة في فن التعامل مع الناس .. البشر بكل اختلافاتهم و تناقضاتهم

هوني على نفسك .. وحاولي تقنني مساحة التفكير فيهم جواكي


مدونة بسيطة و هادية

.. تحياتي

:)

حمامة said...

منى

اكيد اللى بيحب عمره ما يكره
حتى لو مش هيعذر :)

الشموع السوداء

اكيد التطبيق صعب
غير كده سبحان الله حاجة غريبة
الواحد لما الموضوع او الموقف بينتهى
بيشوف الامور مختلفه تماماًَ عما كان جواه شكراً لمرورك :)

حياتى قنبلة ذرية

تعرفى لو مش استفدنا من التجربة
يبقى سورى يعنى لا بنفهم ولا بنتعلم
لازم قبل ما نفكر ف الجرح
نفكر ايه استفدنا منه كمان

حمامة said...

كاميليا

اكيد صح كلامك
بس ده لو هما يستهلوا
او الظروف فرقت بينا
صعب اوى تكتشفى ان اللى كانوا احب الناس ليكى ومثلك الأعلى
طعلوا العكس تماماً

بجد مرورك شرف ليا :)


انا مذنب

ياااااااا
ايه اقسوة دى
ربنا يسامحهم
شكراً لمرورك :)


محض روح

بجد بجد يعنى
مش مهم تقولى
كفاية مرورك :)

حمامة said...

ويست

على مهلك يا سيدى


شيرى

الحب ليس اعمي وانما مصاب بطول نظر لا يدرك الاخطاء الا عندما يبتعد

صح اوى اوى وفعلاً حقيقة يعنى
عندك حق ف كلامك
نورتى :)


حبيبه

بس برضه منسبهوش ينسونا نفسنا
علشان هى احلى منهم اكيد :)


بيسو

كلامك صح
واكتشتفه بعد ما كتبت البوست
مش مهم اللى مسيوا فعلاً
المهم نقدر نحافظ على اللى موجودين


يمامة شاردة

اكيد هى دى خبراتنا
واكيد كنت هابقى اقل من كده لو مكنتش مريت بيها
قد ما بزعل قد ما بحمد ربنا
على الاقل انى اكتشفت حقيقتهم دلوقتى

اسعدنى مرورك :)

عمو said...

مساء الخير
عاجبنى اسم حمامة جداااا هو بالنسبة لى رمز للهدوء والسكينة والتأمل والدفء القديم

فإذا قبلتى تعليقى طبعا

بالطبع كلامى تأخر كثيرا ولكنى فضلت ان اترك تعليقى لما لمستة ى كلماتك من صدق أثر فى ولمس اوتار الماضى مثل الذين سبقونى فى التعليق

تخيلى :ـ
عندما نذرع البذور فى الأرض ويمر عليها الزمن وتصبح أشجاراً كبيرة
اين ذهبت البذور هل ماتت؟ هل تحولت لعدم؟
لا بالطبع

هكذا الماضى وهكذا الذين مضوا يشكلوننا
"يشخبطوا علينا "
:)
مثلما قلتى
فلا داعى للأستيكة هذة لأنك حتى لو تملكينها لن تسطيعى وأصدقك القول ، ان هذا من نعم اللة ايضا كالنسيان
فمن مضو هم الماضى هم التاريخ خاصتنا
نستطيع كل يوم ان نتعلم منة
هونى على نفسك هذة مجرد مرحلة انتقالية
وبعد قليل من الوقت سوف تدركين ذك

حمامة said...

عمو

مساء الورد
ربنا يكرمك ع المجاملة الرقيقة دى
وطبعاص اقبل تعليقك
وفعلاً انت عندك حق
يعنى انا اكاد اجزم ان لو الزمن رجع بكل واحد فينا لورا هيعمل نفس اللى عمله ومعتقدش هيغير اى حاجة منه

اسعدنى مرورك بحق

:)