Thursday, May 29, 2008

طيران غير آمن


يبدو أنهما سيختارا العودة إلى التحليق ليلاً

بعيداً عن أشعة الشمس التي تحرقهما

و أعين البشر التي تؤذيهما

وهمساتهم التي تزعجهما

فالجميع يتساءل عن ماهيتهما

و سر اجتماعهما

كيف ؟ ومتى ؟ ولما ؟

و لأنهما لا يجيدا فن الكذب

فهما يُجيبان بكل وضوح

ربما سيعودا

بعد أن جاهدا ليُحلقا معاً فى النهار

وأمام أعين البشر

إلى الليل الذى طالما كان سكناً لهم

حيث الهدوء والسكينة والصمت

ربما سيعودا

رغم ضعف بصرهما

وعدم قدرتهما على الطيران ليلاً

لطالما عشقا الليل

ولكنهما احبا النهار الذى يجمعهما ايضاً

فكلما زادت نظرات الجميع لهما

وهمساتهم وتساؤلاتهم

زادت معها حرقة الشمس

وزادت بدورها متاعبهما

فما العمل إذاً

هل يعودا إلى معشوقهما الليل

أم يظلا في النهار بمتاعبه

ولا يأبها لكائناً من كان ؟؟؟


على الهامش

امسكني
انا خايفة
:(

31 comments:

يمامة شاردة said...

في رأيي

خليهم يطيروا بالنهار .. أفضل

رغم كل شيء .. هايبقوا _من جواهم_ مرتاحين أكتر

هايبقوا مخنوقين شوية .. لكن مش هايحسوا بالخوف أبدا


ربنا يسعدهم و يهنيهم .. ويجمعهم على خير

:)

اللهم آمــــــين

Lyssandra said...

حمامه يا حبيبتي

طبعا لازم يفضلوا بالنهار

الليل مريح لكن هايبقي هروب

والنهار صح رغم انه متاعبه كتير
ورغم كلام الناس وتساؤلاتهم ونظراتهم الاكثر إيلاما ولسعا من أشعة الشمس
إلا أنه الطريق الصح

المفروض في رأيي يسيبوا الناس تقول
الناس ياعزيزتي بتقول في اي وقت وكل وقت واي كلام وكل كلام

لو انتبهنا لكلام الناس مش هانقدر نتحرك من مكاننا

المهم نبقي عارفين واننا صح ومش بنغلط وان ربنا بس هوا اللي بيحاسبنا
ده بيقوي الواحد ضد كلام الناس

وخلي ف بالك الناس اللي بتتكلم اي كلمه بيوتهم نفسها من زجاج
او علي الاقل موجود شباك زجاج او باب زجاج

الناس اللي بتحاسب مش معصومة من الغلط وكلهم ليهم أخطاء

نشيل الناس بقي من دماغنا طالما اللي بيقولوه مش من مصلحتنا ولا مصلحتهم

اللي هايخاف علينا هاينصحنا مش هايتكلم من بعيد ويسأل وينظر نظرات ناريه

واللي بيحبنا هايوجهنا لطريق صح مش هايقف من بعيد يتفرج ويتكلم

أتمني أكون أفدتك بشئ

تحياتي يا جميله

lyssandra

ريحانة said...

تحت وقع نظراتهم يتضخم إحساسنا بقسوة الطبيعة
لماذا نظراتهم دائما وخزات؟
اممممممممم

طب ياترى باليل حانرتاح من النظرات دى ولا حاتسكن جوانا؟


اعتقد الحل مش ان احنا نتخبى منهم فى الليل عشان حاتغيب نظراتهم ويفضل جوانا الخوف منها



ربما كان الأجدر بنا أنتزاع تأثيراتهم من خلايانا






ولا كأنهم شايفنهم





تقبلى مرورى الاول
رائع البوست

تسلم ايدك:)

قلب ينبض لله said...

البوست في رموز وبصراحة دي اداله بعد اعمق واوقع في النفس والمشاعر

انا مع رأي الناس اللي قبلي
خليهم يطيروا في النهار
هايتعبوا في الأول بس بعد كدا هايفرضوا وجودهم بين الاخرين

تقبلي من تحياتي

حمامة said...

يمامة شاردة

عندك حق
نورتى :)


ليساندرا

فعلاً
بس ساعات كده الواحد ف لحظات ضعف
على الرغم انه بيكون صح ومتأكد من كده
بس بيتخنق

نورتينى كالعادة :)


ريحانة

كلامك عجبنى جدا جداً
فعلاً حتى لو طاروا بليل
كل ما ييجوا يطيروا هيفتكروا انهم لجأوا لليل خوف مش حب


قلب ينبض لله

مرورك بيسعدنى على فكرة
نورتينى يا اميرة :)

عصفور المدينة said...

كانت البداية
حسينا اننا شبههم اوى
وف نفس الوقت شبه بعض
رغم اختلاف الألم
بس حسينا اننا لقينا بعض علشان نطبطب علي بعض
ونبقى جمب بعض
صحيح مش مختلفين اوى زى الغراب ده والحمامة دى
بالعكس شبه بعض ف حاجات كتير
لكن الأهم اننا شبهم ف اننا جمب بعض

حمامة said...

عصفور المدينة

بجد
بجد
بجد

ده اجمل رد

شرف لينا مرور حضرتك

:)

كيكى عوووووو said...

عاملة اييييييييييية انا خلصت امتحانات.....قلت اعدى على الناس الحلوة........النهار ....او الليل مش هتفرق...الى عايز يعمل حاجة غلط هيعملها...والحب عمرة ماكان غلط...احنا الى بنسئ الية...تحياتى...حمامة

Eman Eltaher said...

الأول و قبل ما أرد على البوست
عايزة أقولك انه بجد المدونة عجبتنى اوى
كلماتك و تعبيراتك و كل بوستاتك
انا أصلا مسكت المدونة من أولها لآخر الصفحة

و الصوة اللى انت حطاها للحمامتين دى جميلة و معبرة اوى

نيجى بقى للبوست
عجبنى اوى تشبيه الطيور
و قد إيه هيا أحيانا مش بتبقى مرتاحة حتى ف طيرانها

بس النهار و النور أفضل كتير م الليل و الضلمة
حتى رغم لسعة الشمس و حرقتها

أكيد فيه الضل اللى ممكن نتحامى فيه منها
و لو احنا تايهين عنه مسيرنا هنلاقيه

الفارس الملثم said...

ممكن الخوف ده يكون جوانا ملهوش علاقه بالليل والنهار , خوفنا من الفراق او اننا نتوه من بعض ..

يمكن احساسنا ان الدنيا دايما بتاخد مننا اكتر ما بتدينا ..

بالليل او بالنهار المهم انهم يكونوا جمب بعض ويطبطبوا علي بعض

تحياتي
محمد

سنووايت said...

خلينا طايرين بالنهار حتي لو الشمس حرقتنا ولو العيون جرحتنا
كفاية نشوف النور سوا وهو بينور طريقنا
..

حمامة said...

كيكي

مبروك يا عسل
عقبال النتيجة بالتفوق ان شاء الله
وعقبالى اما اخلص انا كمان
مفيش احلى من النور ف كل حاجة
واللى اتخلق ف الضلمة هيفضل ف الضلمة


Eman Eltaher

ربنا يخليكي يا حبيبتى
منورانا بجد
ويارب على طول
صح الضل
الضل ده هو حبهم :)


الفرس الملثم

ودى مشكلة تانية بتصعب الطيران
ربنا يستر
منور يا فنان :)


سنو وايت

الله
صح
عندك حق
ونشوف كل حاجة حلوة كمان

رحــــيـل said...

المهم انهم يفضلوا مع بعض
المهم ان امانهم سوا وهما عارفين كده

النهار احسن واجمل
ويكبروااااااا دماغهم
المهم انهم مع بعض
بس وخلااااااااااااااص

بنت مصريه said...

الله عليكى بجد
كلامك جميل والهدف منه اجمل
ومدام حبهم طاهر وشريف الاحسن يبقى ف النور امام الكل
مفيش حد بيخجل من حاجه ف النور
احييكى واتمنى تنورينى

دعاء مواجهات said...

انا بقى شايفة انهم يطيروا ليل ونهار ونهار وليل وميهمهمش اى حد ايا كاان ف الدنيا دى

حياتهم وطيرانهم هما وبس

تحياتى ياقمر

شادي أصلان said...

هو ناموس الكون
طيرو بالنهار
واستحملو اشعة الشمس هكذا هيا كل الطيور
ربنا جعلها تطير نهارا ومنها ما يطير ليلا
وخلي الي مش عاجبة يطير بعيد

.:.-=- ELGaZaLy-=-.:. said...

رغم ضعف بصرهما

وعدم قدرتهما على الطيران ليلاً

لطالما عشقا الليل

ولكنهما احبا النهار الذى يجمعهما ايضاً

فكلما زادت نظرات الجميع لهما

وهمساتهم وتساؤلاتهم

زادت معها حرقة الشمس
---------------------------

قوس قزح said...

طول ما حبكم موجود لازم تطيروا

بصوا لعيون بعض و انتم متحسوش بعيون الاخرين ولا بحرارة الشمس


لو حس الناس بالحب كانوا فردوا لكم السما صبح و ليل و فرحوا بعشقكم


متخفيش ابدا بدام جواكم الحب ده

basma saghir said...

امسكوا في بعض قوي قوي

ياأبت...إني رأيت said...

عجبني جدا استخدامك للأسلوب الرمزي في التعبير عن الموضوع والعنوان " طيران غير آمن " موفق جدا خاصة في تأكيده علي مضمون الموضوع

Anonymous said...

ربما سيعودا

حمامة & غراب،، بجد جامدين

ســمـــر احمد said...

فاكرين جملة جاهين المشهورة
المهم نكون سوا و كله على الله
بس حقيقى مهم جدا نعرف ازاى نكون سوا بجد و ده لوحده بيخلق نهار

شهرزاد said...

ليل أو نهار
طالما هناك الحب
فهو قمر يضئ ليلكما
وشمس ساطعة تملأ النهار وتعلن حبكما
ولتجعل منحرارة الشمس نصيبا لمن يقف في طريقكما
نهار كان أو ليل لكن النهار أجمل، نوره تكريم لما بينكما

أحمد سلامــة said...

وهل هناك امتع من نشوة التحليق
وبعيدا عن الجميع
اني لاحسدهم

حمامة said...

ra7eel

صح
مفيش اجمل ولا اهم من اننا نكون سوا
نورتى:)


بنت مصريه

حتى وإن كان الضوء يؤلم
لكنه يجعلنا نرى الأشياء على حقيقتها
وجمال الاشياء فى حقيقتها


دعاء مواجهات

صح برضه
بس هما لو استريحوا الأول ف النهار
هيطيروا ف كل وقت مهما كان

حمامة said...

شادي أصلان


حقاً هو ناموس الكون
فليطيرا إذاً


.:.-=- ELGaZaLy-=-.:.

منورنا



قوس قزح


بصوا لعيون بعض و انتم متحسوش بعيون الاخرين ولا بحرارة الشمس
لو حس الناس بالحب كانوا فردوا لكم السما صبح و ليل و فرحوا بعشقكم


دايماً تعليقاتك قوية

بجد من اجمل التعليقات اللى خلتنى ابتسم

:)

حمامة said...

بيسوو

حاضر
:):)


ياأبت...إني رأيت

شكراً على رأيك الغالى
نورتنا
:)


maha miho

ربنا يخليكي
منورة :)

حمامة said...

ســمـــر احمد

فعلاً وجودنا سوا
هو النهار نفسه
نورتينا
ويارب نشوفك دايماً
:)



شهرزاد



ولتجعل منحرارة الشمس نصيبا لمن يقف في طريقكما
نهار كان أو ليل لكن النهار أجمل، نوره تكريم لما بينكما


صاحبة التعليقات المميزة
نورتى
بستنى وجودك


أحمد سلامــة

نعم هناك
ان تحلق بعيداً
ولكن ليس هرباً
او خوفاً
او ضعفاً
ولكن رغبةً فقط في مزيد من الهدوء

نورت يا فنان
:)

كاميليا بهاء الدين said...

أنا جيت أهو

طيروا بالنهار .. مهما كانت الشمس محرقة
لما تظللوا على بعض مش هاتحسوا بيها

بلاش طيران الليل
كله اخطار
ظلام
مُرهق جدا
وهايكون فيه خوف
وقلق
وهدف مش واضح
من كتر الضلمة

ربنا يجمعكم فى الخير وعلي خير يارب
يارب
يارب


تحياتى وحبى

الميكروباص said...

الطيران باليل مش حلو
لازم يطيروا بالنهار
وان كان الخوف من الناس، فالناس موجوده ليل نهار، وبيتكلموا ليل نهار، وبيبصوا على كل حاجه ليل نهار
فمهما حاولوا يختفوا من الناس مش هايعرفوا

حمامة said...

كاميليا

وجودك مميز
ربنا يتقبل دعاءك الجميل


لورنس العرب

صح اوى
ف كل وقت

منورنا :)